Abuztuaren 24an eta 25ean jokatuko diren pilota partiden berri eman du gaur Elgoibarko Udalak. Pilotari profesionalen arteko partidak izango dira, eta barikuan, uztailaren 21ean jarriko dituzte sarrerak salgai Kaia tabernan edo www.entradasfronton.com webgunean. Egunean bertan frontoian ere eskuratu ahal izango dira, aurrez amaitzen ez badira. Arg.: Ezkurdia, sanbartolomeetako iazko partidan.
Abuztuaren 24ko jaialdian, gainera, Udalak, Aspek eta Lagunak Pilota Eskolakoek Antonio Azpiazu omenduko dute. Lagunak Pilota Eskolako lehendakaria da Azpiazu duela 30 urte kluba sortu zutenetik eta egindako lanaren aitortza jasoko du. Lagunak Pilota Eskolan sartu aurretik ere pilotaren inguruan lan handia egindakoa da Azpiazu, Baltasar elkarte gastronomikoaren bitartez.
